زمانی حەیزەران

بە ئاشکرا دەڵێم؛ ئەم کتێبە لە پێناو ئەوە دەنووسم کە بتوانم هیچ نەبێ بۆ خۆمی بسەلمێنم پێویستە لەمەودوا لە جیادی پیر و کۆن و کەنەفتەکان گەنج و نەوجەوان و لاو، لە جیادی مامۆستا و دوکتۆر و پڕۆفیسۆرەکانیش، قوتابی و خوێندکار و فێرخوازەکان بکرێن بە مەرجەع!
دەمەوێ وزە و متمانەیەکی ئەوتۆ لە ناو دەروونیاندا بڕوێنم کە بە ڕاستی بگەنە ئەو هێزەی بزانن چۆن فێر ببن بتوانن لە جیادی جانتا، دەسەڵات بگرنە دەست؛ لە جیادی مۆبایل و سیدییە ڕۆمانتیک یان خیلاعییەکان، پەساپۆڕتێک بۆ دنیاگەڕان و دنیا دیتن بخەنە باخەڵی خۆیانەوە؛ لە جیادی دەرگا قفڵدراوەکانی ماڵ یان بەشە ناوخۆییەکانیش چەند ڕێگایەکی خەونییان هەبێت.