یادەوەری و زەمەن

یەکێ لە گرنگترین پرسیارەکان ئەوەیە ئاخۆ جودایی ڕۆشنبیر لەگەڵ کەسانی دیکەدا چییە؟ هەڵبەتە دەکرێت لە زیاد لە گۆشە نیگایەکەوە لەم کێشەیە بڕوانین، دەکرێت بگەڕێنەوە سەر پێناسە تەقلیدییەکان، باس لە دابەشبوونی کاری جەستەیی و کاری فیکری بکەین، باس لە ڕەفتار یان دیمەنە دەرەکییەکان بکەین، باس لە سروشتی دەزگاکان بکەین، بەتایبەت ئەو دەزگایانەی ڕۆشنبیران دەیبەن بەڕێوە، باس لە پیشەکانی ڕۆشنبیر بکەین، سنوورەکانی ئەو ناونانە گەورەبکەین و بچووکیبکەینەوە، چەندین توێژی خوێندەواری کۆمەڵایەتی تێبئاخنین، لە نێوان چەمکی {ڕۆشنبیر} و {خوێندەوار}دا، لە نێوان ڕۆشنبیر و هەڵگری شەهادەکاندا، لە ..نێوان ڕۆشنبیر و کارمەندە چینایەتییە کارامەکاندا {وەکوو گرامشی کردی} جیاوازییەکانی بچوکبکەینەوە.